Monday, June 10, 2013

ရှတတမိတော


             မိတောနှင့် စတင်သိကျွမ်းရသည်မှာဆန်ပိုးများဖြစ်သည်။ ယခင်က မလေး (အိမ့်ချမ်းမြေ့) မိတော ဇာတ် လမ်းများစွာ ကို ရေးခဲ့သည် ဟုဆိုသည်။ သို့သော် ကျွန်မ မဖတ်ဖူးခဲ့။ အင်တာနက်ဘလော့ဂ် စာမျက်နှာ ကို နောက်ကျမှ ရောက်ရှိလာခြင်းကြောင့် ယခင်ရေးနှင့်ကြပြီးသော ဘလော့ဂ်စာများကို မဖတ်ရှုဖူးခဲ့ပေ။ အချိန်ရှားပါးမှုနှင့် မျက်လုံးပြဿနာကြောင့် စာစုံဖတ်ရှုနိုင်ဖို့၊ ရှာဖွေဖို့ခဲယဉ်းနေခဲ့သည်။ 'မိတောနှင့် ဆန်ပိုးများ' ကိုဖတ်ရှုမိချိန်တွင် သဘောတကျနှင့် အစမှ အဆုံးတိုင် ပေါ့ပါးရွှင်သာစွာ ဖတ်ရှုဖြစ်သွား သည်။ ဆန်ပိုးများကို တွေ့ရှိကာရှင်းလင်းဖြစ်ရာမှ ၎င်းဆန်ပိုးလေးများအကြောင်း စပ်စပ်စုစု ရှာဖွေလေ့လာ သည့် အကြောင်းမျှသာ ဖြစ်သော်လည်း ရေးသားပုံသွက်လက် အရွှင်ဓာတ်ပါကာ ခေတ်ကိုပါ မထိတထိ သရော်စာလေးများဖြင့် ရိပ်ဖမ်း သံဖမ်းထည့်ရေးသွားသည်။

          မိတောခမျာ သူ့ဆန်ပိုးများအကြောင်း ပြောပြရန် ကိုရင်သာအေးကိုလိုက်ရှာနေချိန်တွင် တွေ့မြင် လိုက်ရသောအဖြစ် သနစ်ကိုရေးပြသွားသည်မှာ တစ်ပိုဒ်ထဲနှင့် မျက်မှောက်ခေတ်ကို သိမ်းကြုံးသရော် သွားနိုင်သည်။

'အင်တာနက်စာမျက်နှာ များပေါ်တွင် မြန်မာပြည်အရေးများဖတ်ပြီး မျက်နှာတည်တည်ကြီးဖြစ်နေသော ကိုရင်သာအေး ကိုလှမ်းမြင် လိုက်သည်။ သူ့မျက်နှာရိပ် မျက်နှာကဲကိုကြည့်ခြင်းဖြင့်   မြန်မာပြည် တစ်နေ ရာရာမှာ မြစ်ရေလျှံပြန်ပြီလား၊ မီးပျက် ပြန်ပြီလား၊ မီးလောင်ပြန်ပြီလား၊ လက်ကိုင်ဖုန်းတွေ ဈေးတက်ပြန်ပြီ လား၊ ဆည်တွေဆောက်ကြပြန်ပြီ လား၊ တောင်တွေ ဖြိုပြန်ပြီလား၊ ဘယ်သူက ဘယ်သူ့ ကိုနမ်းပြန်ပြီလဲ… တစ်ခုခုတော့ ဖြစ်နေပြန်ပြီကို ရိပ်မိလိုက်ရပြန်သည်။ဒါကြောင့် ဘာမှ မပြောဝံ့တော့ဘဲ အိမ်ပေါ်သို့ အသာလေးတက်လာလေသည်။' 


          မိတောရေးသားပုံမှာ အရွှန်းဖောက်နေခြင်းမဟုတ်သော်လည်း သူမ၏ပြုမူလှုပ်ရှားပုံကလေးများ၊ စကားများ၊ ပတ်ဝန်း ကျင်မှ လူများနှင့် ကူးလူးဆက်နွယ်သော အဖြစ်သနစ်များက ပြုံးစရာ၊ ရယ်မောစရာ   ဖြစ်နေသည်။ တစ်နည်း လူ့စရိုက်၊ လူ့ သဘာဝကို အသော့လေး ဖော်ဆောင်နေသည့်နှယ်။ 'ဆန်ပိုးများ' ကို ဖတ်ပြီးပြီးချင်း မိတော၏ပုံရိပ်ကို အသေအချာမြင် ယောင်လာမိသည်။ အလားတူ မိတော စာစုများရှိ   နေသေးကြောင်း သိရှိရချိန်တွင် တစ်ပုဒ်အကြောင်းအရာတစ်မျိုးစီနှင့် လူနေမှုဝန်းကျင်၏ ကမောက် ကမ၊ ခေတ်၏ ယိုင်နဲ့မှုတို့ကို ဖော်ပြသွားလိမ့်မည်ဟု ခန့်မှန်းသိရှိခဲ့သည်။

           မိတောစာစုများ စုစည်းထုတ်ဝေမည်ကြားရသောအခါ ၀မ်းသာမိသည်။ မိမိ မဖတ်ရသေးသော မိတောစာစုများကို တစ်စု တစည်းတည်း ဖတ်ရတော့မည်။ သို့သော် တော်တော်နှင့် မိတောက စာအုပ် အဖြစ်ရောက်ရှိမလာ။ စာရေးသူက ဝေးလံ လှသော ကနေဒါနိုင်ငံတွင် အခြေချနေထိုင်ခြင်းကြောင့် စာအုပ် တစ်အုပ်အဖြစ်ပုံဖော်ရန် လွယ်ကူချောမွေ့မှုရှိမည်တော့ မဟုတ်။ ထိုသို့ဖြင့် မေလလယ်ခန့်တွင် 'မိတော ရဲ့ရှတတနေ့စွဲများ' အဖြစ်စာအုပ်ထွက်ရှိလာလေသည်။

          ဦးစွာ စာအုပ်အပြင်အဆင်ကို နှစ်သက်သဘောကျစွာ သတိပြုမိခဲ့သည်။ နံ့သာရောင်ဖျော့   ဖျော့နောက်ခံတွင် ရှေ့မျက်နှာဖုံး ရှိ ကွန်ပြူတာတစ်လုံးနှင့် အလုပ်ရှုပ်နေသော ဆံရစ်ဝိုင်းလေးနှင့်မိတော သရုပ်ဖော်ပုံက ပြုံးမိစေသည်။ မိတော ဘာတွေများ အလုပ်ရှုပ်၊ ဘယ်လိုအရာတွေ ကြုံတွေ့ပြုံးမိစေဦး မည်လဲ..။

          နောက်ကျောဖုံးတွင်
                   'ဖြစ်လေ့ဖြစ်ထရှိတဲ့
                   အဆီအငေါ်မတည့်မှုများ
                   ကပေါက်တိကပေါက်ချာများအတွက်      
                   အမြဲရှိနေမယ့် မိတောရယ်ပါ'
          ဟု မိတောကို တိုတောင်းစွာ ဖွင့်ဆိုထားသည်။ ဖလင်ပြားအတွန့်အလိပ်များထက်မှ မိတော ဇာတ်ဝင်ခန်းများက စိတ် ၀င်စားမှုကို အရှိန်မြင့်စေသည်။ လောကသဘာဝအတွင်းမှ မသိလိုက်၊ မသိဘာ သာ သတိမထားမိကြသော အဆီအငေါ် မတည့်မှုများ၊ အံဝင်ခွင်ကျမဖြစ်မှုများ, များစွာ ရှိနေပါသည်။ ဒါတွေကို သတိပြုမိသော စာရေးဆရာမကတော့ 'မိတော' ကိုဖြစ်တည်စေခဲ့ပြီ။ ဆံရစ်ဝိုင်းလေးနှင့် မိတော မည်သို့သော အဖြစ်အပျက်တွေကြားမှာ မြင်တွေ့ရမည်လဲ…။


*******


          မိတောကို 'မိတောနှင့် နွယ်ရီ၊ သဲတဖြစ်လဲ မိတော၊ မိတောနှင့် ကနေဒီယန် ကန်စွန်းရွက်၊ မိတော ရဲ့ နံနက်ခင်း၊ မိတောနှင့် ပုရွတ်ဆိတ်သိုင်းလေပွေရိုင်း၊ မိတောနှင့် အညိုရိပ် (၅၀)၊ မိတောနှင့် ၀ါးမီးတိုင် များ၊ မိတောနှင့် အမြွှာတံတားကြီး၊ မိတောနှင့်ဘဲဆီ၊ မိတောနှင့် ဆန်ပိုးများ၊ မိတောနှင့် ငါးပုပ်ခြောက်၊ မိတောနှင့် နွေရက်များ၊ မိတောနှင့် နှင်းမုန်တိုင်းတစ်နေ့၊ မိတောနှင့် ရန်ကုန်' စသဖြင့်ခေါင်းစဉ် (၁၄) ခုနှင့်မြင်တွေ့ရပါသည်။ ကနေဒါနိုင်ငံတွင် အခြေပြုနေသော ဇာတ်ကောင်မိတော၏ မြန်မာဆန်သော အတွေးအမြင်၊ အငွေ့အသက်ကို ရရှိခံစားမိသည်။ ဇာတ်လမ်းတစ်ခုစီ၏ ပီပြင်ကျန သော သရုပ်ဖော်ပုံ များက မိတောသရုပ် ကို ပိုမိုပီပြင်စေပါသည်။ မှတ်မှတ်ရရဖြစ်မိစေသော၊ စွဲထင်နေသည့် မိတော၏ ပုံရိပ် အချို့တစ်ဝက်ကို ဖော်ပြလိုက်ပေသည်။

          မိတောနှင့်နွယ်ရီ
                   မိတော သူငယ်ချင်း နွယ်ရီဟူသော အမည်လှလှကို ကနေဒါမှ ကားလိုင်စင်ရုံးဝန်ထမ်း၏ မပီသစွာ ခေါ်လိုက်ပုံ က 'နွားကြီး' တဲ့..။ မအီမလည် နွယ်ရီ့ ရုပ်သွင်ကိုပါ မြင်ယောင်ကာ ပြုံးမိစေသည်။ ဘာသာစကား အကူးအပြောင်းသည် မိတော ၏ ပတ်ဝန်းကျင်ဝယ် ပေါ့ပါးရယ်မောစရာ အဖြစ် ဖြစ်တည် သွားလေသည်။ ချိုသဲခင်၏ အဖြစ်သနစ်ကလည်း မပြုံးဘဲ ၀ါးလုံးကွဲ ရယ်ချင်စရာ။ စက်မဖွင့်ရသေးသည့် မျက်စိစမ်းသပ်စက်ထဲ ၀င်ကြည့်ကာ မမြင်ရတော့ဘူး ဟူသည့် သူငယ်ချင်းမ ချိုသဲခင်ကို မိတောကလည်း ကပေါက်တိကပေါက်ချာအားပေးနေပြန်ပါသေးသည်။ ထိုသို့သော မိတော…..။

          သဲတစ်ဖြစ်လဲ မိတော
                   နာမည်တွင် သဲ မပါလေသော မိတောကို သဲ ဟု တသွင်သွင်ခေါ်လေ့ရှိသည့် အန်တီကြီး များနှင့် အဖြစ်သနစ် များက ပြုံးချင်စရာ။ အန်တီကြီးများ၏ ဖြစ်ပျက်မှုအလွဲများ၊ အတွေးအလွဲတွေကြား မိတောခမျာ အူလည်လည်ဖြစ်နေရှာသည်။ ခမ်းနားလှပသော အေးချမ်းသာယာသည့် အဆောက်အဦးကြီး ကို ငှားနေကြမည်ဟု အတိုင်အဖောက်ညီနေကြသည့် အန်တီကြီး တို့ကို အရူးထောင်ဟု ကပျာကယာ ရှင်းလင်းပြောပြရသေးသည်။ ဆံပင်ညှပ်ဆိုင်လမ်းညွှန်လိုက်သည်ကို ရှာမတွေ့လေသော လူငယ်တစ်ဦး၏ အဖြစ်သနစ်က ရယ်စရာ။ The Bay ဟူသည့် ဆိုင်ကိုရှာမတွေ့ဘဲ ပန်းပွင့်ကြီးနှင့်ဆိုင်သာ တွေ့ခဲ့သည်တဲ့။ ဆိုင်၏ ဆိုင်းဘုတ်ရုပ်ပုံကို ထည့်သွင်းဖော်ပြထားသည်ကို ကြည့်မိပါက ရယ်ချင်စရာအမှန်ဖြစ်ပါလိမ့်မည်။

          မိတောနှင့် ကနေဒီယန်ကန်စွန်းရွက်
                   ရှားပါးလှသည့် ကနေဒီယန်ကန်စွန်းရွက်များ အစ်မ၀မ်းကွဲ၏ အိမ်နားရေမြောင်းထဲ မှာ တောထအောင်ပေါက်နေ သည့် သတင်းကြားရ၍ ခူးယူရန် နေ၀င်ရီတရော အချိန်ကို ရွေး၍ ၀မ်းသာ အားရသွားလေသည့် မိတော…။ သူ့နှယ် ကန်စွန်း ရွက် ခူးထွက်ကြလေသော ရွှေမြန်မာများအား အုန်းအုန်း ကျွတ်မျှ တွေ့လိုက်ရ၍ ရှက်အားပို နောက်ပြန်လှည့်မိလေသော မိတော…။   မြူးကြွသော အရေးအသားက မိတောကို ပုံပေါ်မြင်ယောင်လာစေသည်..။

          မိတောနှင့် ပုရွက်ဆိတ်သိုင်း လေပွေရိုင်း
                   ညနေခင်းကိုယ်လက်လှုပ်ရှားလမ်းလျှောက်ထွက်သော အဖြစ်သနစ်မှာ ပြုံးချင်စရာ မက ဒေသတွင်း ပြုလေ့ ရှိသည့် ပုံရိပ်များကိုပါ မြင်သာစေပါသည်။ တရုတ်အဘိုးကြီးတစ်ဦးပြုလုပ်သလို သဘာဝဓာတ်တွေ စီးမျောလာအောင် လိုက်လံ တုပလေ့ကျင့်ခန်းပြုလုပ်ကြည့်ပါလေသော မိတော… သူ့အလှည့်ကျကာမှ ပုရွတ်ဆိတ်အုံနှင့် တိုးမိ၍ ပုရွတ်ဆိတ်သိုင်း ဖြစ်သွား ရတော့သည်။ ထိုစာပုဒ်ကလေး တွင်တော့ မိတော မိသားစု၏ ဘ၀နေထိုင်မှု၊ ကူးလူးဆက်နွယ်မှု ပုံရိပ်ကလေးများကိုပါ ခပ်လွန့်လွန့်မြင် ရလေသည်..။

          မိတောနှင့် ၀ါးမီးတိုင်များ
                   အစိုးရ ရုံးတစ်ရုံး၏ ဧည့်ကြိုနေရာတွင် အများပြည်သူကြည့်ရန်ထားပေးသည့် ကွန်ပြူတာခုံ ကလေးမှာ ထိုင်ရန်ကြိုးစားသည့် တရုတ်အဘိုးကြီး၏ အဖြစ်ကိုဖတ်ရသည်တွင် အသံထွက်ရယ်မောမိတော့ သည်။ ကွန်ပြူတာခုံမှာ အရှင်မို့ လိုသလိုညှိယူရသည်ဖြစ်ရာ ထိုအရာနှစ်မျိုးကို အခါခါညှိယူနေရာမှ ချွေး တလုံးလုံးဖြစ်နေရှာသည့် တရုတ်အဘိုးကြီးကို မြင်ယောင်လာသည်အထိ အရေးကောင်းခဲ့သည်။ မိတော ကူညီပေးလိုက်၍ အဆင်ပြေသွားသော် တပြုံးပြုံးနှင့် သုံးစွဲမည်ပြင် ကာမှ နှစ်မိနစ်လောက်ပဲ ရှိသေးသည့် အချိန် ချိန်းထားသည့် သူ ရောက်လာ၍ မထချင်ထချင် ထလိုက်ရသည်ကို ရေးထားရာ ရယ်မောသဘော ကျမိသည်။

                   'ကွန်ပြူတာ ကြည့်တော့မည်ဆိုကာမှ လာခေါ်သော အမျိုးသမီးနောက်သို့ မကျေမနပ်လိုက် ပါမသွာခင် စိတ်တိုပြီး မောက်စ်ကို တစ်ချက်မသိမသာ ဆောင့်ချလိုက်သည်'

                   ထို့နောက် ရာသီဥတုသာသာယာယာရှိလေတုန်း ကဗျာဆန်ဆန် ၀ါးမီးတိုင်လေးတွေ ထွန်း ကာ ညအလှကို ရှုစားခံစားချင်ပါလေသည့် မိတော..။ နောက်ဆုံးတော့ ပတ်ဝန်းကျင်မှ လူအများ အိပ်မော ကျလေမှ ကြယ်ရောင်ပြိုးပျက် ညလေသာသာယာယာက တိုက်ခတ်ချိန်တွင် သူမ၏ ငါးမူးတန် ၀ါးမီးတိုင် ဘအလှများကို အေးအေးချမ်းချမ်း ရှုစားခွင့်ရတော့သည်။ အနုပညာဖြင့် ပျော့ပြောင်းနူးညံ့လှပါလေသော မိတော……။

          မိတောနှင့် အမြွှာတံတားကြီး

                   ခမ်းနားလှပပါလေသော အမြွှာတံတားကြီး၏ ပုံရိပ်ကိုပါ ထည့်သွင်းဖော်ပြထားသည်။ သူ နေ့စဉ်ဖြတ်သွားနေရ သည့် တံတားကြီးအကြောင်း ရေးသားထားခြင်းဖြစ်သည်။ ဆောင်းပါးဆန်သော အပုဒ်တစ်ပုဒ်ဖြစ်ကာ ဒေသတွင်းဗဟုသုတများ၊ ဖွံဖြိုးပြီးနိုင်ငံများ၏ လက်ရှိလူနေမှုတို့ကို မသိမသာ ခပ်ပါးပါး ဖော်ပြသွားသည်။ နေ့စဉ်ဖြတ်သန်းသွားလာနေကျ ယာဉ်ကြော ငါးလိုင်းပါ တံတားဘေးမှာ ယာဉ်ကြောဆယ်လိုင်းပါ တံတားကြီးလာဆောက်နေသည်ကိုပင် သတိမပြုမိသည့် မိတော၏ စကားများ က ပြုံးချင်စဖွယ်..။

                   'မိတောလည်းညာဘက်က တောင်တန်းကုန်းမြင့်များကိုသာ ငေးပြီး စာရေးဖို့လောက်ပဲ စဉ်းစားနေသောကြောင့် လည်းကောင်း၊ ကိုယ့်တိုင်းပြည်လည်း မဟုတ်သဖြင့် ၁၀ လိုင်းမပြောနှင့် လိုင်း ၄၀ လမ်းကြိးဖောက်လည်း ရင်မခုန်သောကြောင့် လည်းကောင်းသတိမထားမိ'

                   ဒီမိုကရေစီနိုင်ငံများတွင် ကောင်းကွက်ရှိသလို စိတ်ပျက်ဖွယ်များလည်း များစွာရှိသည့် အကြောင်း ထိုအမြွှာ တံတားကြီးဖြင့် ဥပမာပေး ပြောသွားသည်။ လူဦးရေ သုံးဆယ့်ငါးသန်းသာရှိသော ကနေဒါနိုင်ငံတွင် နှစ်ပေါင်းသုံးဆယ်ကျော်   ငြင်းခုံကြ၊ ဆန္ဒပြု၊ မဲထည့်ကြပြီးမှ ထိုတံတားကြီးကို အကောင် အထည်ဖော်နိုင်ခဲ့တော့သည်။ တိုးတက်လှပါသော   ခေတ်မီနိုင်ငံကြီးများ နောက်ကွယ်မှ အခွန်အတုတ် များကိုလည်း ထည့်သွင်းရေးဖွဲ့သွားခဲ့သည်။

          မိတောနှင့် နွေရက်များ
                   ပူပြင်းလှသော နွေရက်အချို့ကို ဖြတ်ကျော်နေရခြင်းကို ဟာသနှော ရေးသားသွားခြင်းဖြစ် သည်။ သရုပ်ဖော်ပုံ အထိမိဆုံးအပုဒ်တစ်ပုဒ်ဖြစ်သည်။ ကနေဒါ၏ နွေရာသီအပူရှိန်အောက်တွင် ဒဏ် မခံနိုင်တော့သည့်နောက်ဆုံး ခုံတစ်လုံးကို   ရေခဲသေတ္တာရှေ့ချ ပန်ကာကို ရေခဲသေတ္တာဘက်လှည့်၍ မိုင်ကုန်ဖွင့်ကာ ရေခဲသေတ္တာထဲ အရှိန်ဖြင့် ၀င်သွားသည့် လေတွေက အရှ်ိန်ဖြင့် ပြန်ထွက်လာကာ ထို တဟူးဟူးအေးမြသည့်လေကို နှစ်သက်ကြည်နူးစွာ ခံယူနေပုံလေးက တစိမ့်စိမ့်ချစ်ခင်မိ ကာ ပြုံးမိစေသည်။ အို ဘယ့် ကြံကြံဖန်ဖန် မိတော….။

          မိတောနှင့်ရန်ကုန်
                   ရန်ကုန်လူနေမှုစနစ်နှင့် ခေတ်ကာလသရုပ်ကို ဖြူစင်သော ရှုထောင့်အမြင်မှ ခပ်ပါးပါး သရော်သွားသည်ကို မြင်တွေ့ရ သည်။ လိုင်းမမိပါသော ဖုန်းလိုင်းများ၊ ပတ်ဝန်းကျင်သို့ ထိခိုက်လွင့်ပါး ကျယ်လောင်သော အသံချဲ့စက်သံများ၊ ဆယ့်တစ်နာရီ အချိန်ဝန်းကျင်မှာမှ အမှိုက်ပစ်ရန်  ကြေငြာသည့်   လေးစားအပ်ပါသော မိဘပြည်သူများခင်ဗျား အစချီသည့် စည်ပင်ယာယာမှ လော်စပီကာသံ..။

                    'မိတောလည်း လေးစားအပ်သော လူကြီးမိဘပြည်သူများထဲတွင် တစ်ယောက်အပါ အ၀င်ဖြစ်သဖြင့် သူတို့ ဘာပြော မလဲဟု ဆက်ပြီးနားထောင်နေလိုက်သည်'

                   - ဟူသော အဖွဲ့က ပြုံးချင်စရာ။ ဆယ်လနီးပါး လူအများစည်းကမ်းမရှိမှုကို သည်းခံခွင့်လွှတ်   နေနိုင်သည့် စည်ပင်သာယာကို မိတောက ကျေနပ်စွာ ရှိနေပြီးမှ အကြိမ်ကြိမ်မေတ္တာရပ်ခံနေသဖြင့် နားမခံသာတော့သည့် မိတော

                   'တော်ပြီလေ၊ တော်လောက်ပြီလေ….လူကြီးမိဘတွေ ဒီလောက်ဆို သဘောပေါက်ပြီလေ'

                   ခေါင်းအုံးနဲ့ ခေါင်းကို ဖိကာ ခပ်တိုးတိုးအော်ဟစ်နေသည့် မိတောကိုပါ မြင်ယောင်လာတော့ သလို…။

               မိတောစာစုများကိုအကုန်အစင်ဖတ်ရှုပြီးချိန်တွင် နှစ်သက်သဘောကျရုံသာမက ပြုံးပျော်ရွှင်မြူးစေသည်။ မိတောသည် သာမာန်မိန်းမပျိုတစ်ဦးမျှသာ…။ သို့သော် မိတော၏ အတွေး၊ ကြုံတွေ့ရသည့် ပုံရိပ်များက မျက်မှောက်ခေတ် လူမှုအဖွဲ့အစည်း၊   ခေတ်စနစ်၏ ကောင်းမွေ၊ ဆိုးမွေကို သေသပ်ကျနစွာ မီးမောင်းထိုး   ဖော်ပြသွားနိုင်ခဲ့သည်။ မိတောသည် မြန်မာစာပေတွင် ရှားပါးလှသော အဆင့်မီသရော်စာတစ်အုပ် သာ ဖြစ်ပါတော့သည်။                   ။


ရွှေအိမ်စည်
30.5.2013
PM:11;15


♦♦♦♦♦♦♦♦♦♦♦♦♦♦♦♦♦♦♦♦♦♦
နောက်ဆက်တွဲဖြည့်စွက်ချက်
♦♦♦♦♦♦♦♦♦♦♦♦♦♦♦♦♦♦♦♦♦♦
 ၂၀၁၃၊ စက်တင်ဘာလထုတ် (နယူးစတိုင်မဂ္ဂဇင်း)

No comments:

Post a Comment